Amay namon, ikaw ang pinakamaloloy-on, masarigan kag mapinalangga-on.

Ginapangayo namon sa imo nga dugangi ang amon pagtuo kag paghigugma kanimo agud nga magamit namon ang “blogging” bilang kasangkapan para matupad ang imong mga katuyuan. Kabay nga himu-on mo kami nga mga “bloggers” kang kamatuuran kag manog pahayag kang paghidaet.

Buligi kami nga mangin marig-on sa amon ginapanindugan bilang Kristiano agud nga ang mga tao nga magbisita sa amon mga “blogs”
makakita kang tuburan kang inspirasyon kag kaaraydan sa andang pagkabuhi.Taw-i kami kang kusog kag kabaskog agud nga mapahayag namon ang imong Pulong agud nga mangin instrumento kami sa pagrumpag kang pader kang indi pagtaramdanay o kagamuhan sa kalibutan, kag magamit namon ang “blogs” para maparig-on ang pag-abyanay, pag-irimaway kag paghigugma.

Himu-a ang amon mga kasingkasing nga mga maamo kag indi mag-mataas, agud nga matrato namon ang mga nagabasa kang amon “blogs” bilang mga abyan, kag indi pangpadugang sa isip lamang;kag manikasog kami nga mabag-o ang amon kaugalingon para sa kaaraydan, antes ang amon “sign templates”, kag magta-o kami kang panahon agud mabuhinan ang pagpakasakit sa aton mga puluy-an kaysa magsabat kang mga komentaryo nga binilin kang mga tao nga indi mo gani makilala; kag mag-abi-abi kami permi sa amon kasiringan samtang naga “chat” kami sa mon mga kaabyanan sa blog; agud nga kami mangin mabinalak-on sa pagbulig sa mga tao nga kapos kaysa mga tao nga naga ‘subscribe” kang amon RSS feeds.

Amay, ipaiway nga madaog kami kang mga “spams kag viruses”, kang kahambugan kag pagkamaiyaiyahon, kag mga pagsulay sa pagkopya kang mga imahen kag mga ideya nga wara ti permiso kag pagkilala sa orihinal nga nagsulat.

Kabay nga imo kami ihigpong bilang mga “network of bloggers” kag mga abyan nga naga iririmaw sa pagtrabaho tungod sa imong ngaran. Kabay nga ang amon mga “blogs” makadara kanamon parapit kanimo.

Ginapangayo namon dyan tanan kanimo paagi kay Kristo nga amon Ginuo. Amen.

________________

This prayer is a Kinaray-a translation of “A Blogger’s Prayer“, which I composed for the Philippine Blog Awards 2007. Kinaray-a is an Austronesian language spoken mainly in Antique Province in the Philippines. The Kinaray-a version is courtesy of Mr. Isidro Erispe, a native Aklanon who works in Veterans Memorial Hospital in Quezon City. He is a writer, educator and a former discalced Carmelite. There is also a Tagalog and a Spanish version of this prayer.